فهاد الزمان حيراتني واحد القضية !!

فهاد الزمان حيراتني واحد القضية !!

البنت بغاتو تركي والولد بغاها سويدية !!

هادي مابغات ولد البلاد خدام خدمة عادية !!

وهذا بغا الشهبة والوراق آش يدير بالسعدية !!

نسيتو الواقع المر لي عايشين فيه نتا ونتيَّا !!

آ خويا علاش كاتشوف بعيد واش معجباتكش المغربية !!

أنا بعدا كانفضل بنت بلادي لي تفهمني وتطهلا فيا !!

ههه وتشبعني شهيوات وحريرة وشباكية !!

واخا نكون غي خضار تكون تبغيني وقابلة بيا !!

وحسن من هاديك آلزعرة السويدية !!

عندها برويطة ودار وكاتكبر عليا !!

وكاتحكم ماعرفتش شكون الراجل واش أنا ولا هي !!

وأصلا ماعندي ماندير بلي ماتعرفش بحق وآآليديا !!

والله يخلي ليا بنت بلادي تكون خلوقة ونعم التربية !!

وهاديك البنت لي بغات تركي واش غادي يبغيهاا !!

ماضربتش الحساب للمستقبل وآش مخبي ليها !!

ماتعرف لا طياب لا عجينة غي كاتشوف بعينيها !!

مسكينة المسلسلات التركية آثرو عليها !!

تبقا دّور حتا تشبه وفالأخير مغربي يتزوج بيها !!

يعيشو فالحلال ويولدو وليدات ويتهلا فيها !!

يا ختي خليك مع ولد بلادك لي عزيز عليه المعقول !!

آشمن ربح غادي تجيبيه من بيروت ولا إسطنبول !!

رجالهم يديرو الماكياج ماتعرفيش كريم من البتول !!

شوفي المغربي الخدمة والكتاف خدام بحال الغول !!

صراحة هادو لي كايفكرو هاكَّا غي ديال التصرفيق !!

علاش باغي طير وعلا ناس بلادك تعيق !!

المهم أنا قلت لي عندي ونتا بقا تحلم حتا تفيق !!

ونتي بقاي تابعة المسلسلات التركية !!

حتا تلقاي راسك فالنهاية ديال الطريق !!

وتبقاي تڭولي ياربي تسهل عليا !!

بشي راجل وخا يكون من المزمبيق !!

وتقولي إييييه مهنّد ولد الحرام دارها بيا !!

وتكرهي أيام الماكياج والتحنقيز والتجلويق !!

منشورة في: شعر حكيم